Elan Yerləşdirmə Qaydaları

1. Ümumi müddəalar

1.1. Bu Qaydalar İstifadəçi Razılaşmasının ayrılmaz hissəsidir və Platformada elan yerləşdirən bütün İstifadəçilərə, o cümlədən əmlak agentliklərinə və tikinti komplekslərinə şamil edilir.

1.2. Elan yerləşdirmək üçün hesab tələb olunur. Qeydiyyatsız elan yerləşdirildikdə hesab təqdim olunan məlumatlar əsasında avtomatik yaradılır.

1.3. Bütün elanlar moderasiyadan keçir. Qaydalara uyğun olmayan elan dərc olunmaya, redaktə edilə və ya silinə bilər. Qaydaların təkrar və ya ciddi pozulması hesabın məhdudlaşdırılması və ya bloklanması ilə nəticələnə bilər.

1.4. Qaydaların pozulması səbəbindən dərc olunmayan və ya silinən elan üzrə ödənilmiş xidmət haqqı, İstifadəçi Razılaşmasının 8-ci bölməsində və qanunvericilikdə nəzərdə tutulan hallar istisna olmaqla, geri qaytarılmır.

1.5. Administrasiya bu Qaydalara dəyişiklik edə bilər. Dəyişikliklər İstifadəçi Razılaşmasının 13-cü bölməsində göstərilən qaydada dərc olunur və qüvvəyə minir.

2. Hesab və əlaqə məlumatları

2.1. Hər İstifadəçi yalnız bir hesabdan istifadə edə bilər. Platformada artıq mövcud olan e-poçt ünvanı və ya telefon nömrəsi ilə yeni hesab yaratmaq qadağandır.

2.2. Fərdi İstifadəçilər “Ad” sahəsində şirkət adı, kommersiya və ya reklam xarakterli ifadələr göstərə bilməz. Əmlak agentlikləri və tikinti kompleksləri öz rəsmi adlarını göstərir.

2.3. Əlaqə nömrəsi ölkədaxili mobil operatorlara (Azercell, Bakcell, Nar və s.) məxsus olmalı və İstifadəçinin özünə və ya təmsil etdiyi şirkətə aid olmalıdır. Üçüncü şəxslərin nömrəsini və ya əlaqə məlumatlarını göstərmək qadağandır.

2.4. Elanda göstərilən əlaqə nömrəsi avtomatik olaraq İstifadəçinin hesabına bağlanır. Növbəti elanda başqa nömrə daxil edildikdə yeni nömrə əvvəlkini əvəz edir və hesabın əlaqə məlumatlarında yalnız son daxil edilən nömrə saxlanılır.

2.5. Elanda göstərilən əlaqə nömrəsi Platformanın bütün ziyarətçiləri üçün açıq göstərilir. Əlaqə məlumatlarının işlənməsi Məxfilik Siyasəti ilə tənzimlənir.

3. Elan limitləri və müddətlər

3.1. Fərdi İstifadəçilərə ayda 1 ödənişsiz elan haqqı verilir; istifadə olunmamış haqq növbəti aya keçmir. Əlavə elanlar elan paketi alınmaqla yerləşdirilir. Əmlak agentlikləri və tikinti kompleksləri elanları Elan balansı hesabına yerləşdirir (İstifadəçi Razılaşmasının 4.4-cü bəndi).

3.2. Elanın aktivlik müddəti 30 gündür. Bu müddət VIP və İrəli çək xidmətləri vasitəsilə uzadıla bilər.

3.3. Aktivlik müddəti bitmiş elan arxivə keçir və 90 gün ərzində Şəxsi kabinetdən yenidən aktivləşdirilə bilər. Aktivləşdirmə ödənişsiz deyil – bu zaman 3.1-ci bəndə uyğun olaraq bir elan yerləşdirmə haqqı istifadə olunur.

3.4. Eyni əmlakı həm arxivdən bərpa etmək, həm də yeni elan kimi yerləşdirmək qadağandır.

3.5. Əmlak satıldıqda və ya kirayəyə verildikdə İstifadəçi elanı deaktiv etməli və ya silməlidir. Aktual olmayan elan aşkar edildikdə Administrasiya onu gizlədə və ya silə bilər; belə elana tətbiq edilmiş ödənişli xidmətlərin haqqı geri qaytarılmır.

4. Elanın məzmunu

4.1. Elan yalnız real və mövcud olan daşınmaz əmlak barədə olmalıdır. Hər elan yalnız bir əmlakı əks etdirməlidir; bir neçə əmlakın bir elanda göstərilməsinə yol verilmir.

4.2. Elan uyğun kateqoriyada yerləşdirilməli və elan verənin statusu (Mülkiyyətçi və ya Vasitəçi) düzgün seçilməlidir.

4.3. Ünvan xəritədə dəqiq göstərilməli, həmçinin müvafiq sahələr (şəhər, rayon, qəsəbə, metro) doldurulmalıdır.

4.4. Qiymət sövdələşməyə təqdim olunan bütün əmlak üçün tam və real məbləğlə göstərilməlidir (kvadratmetr və ya hissə üçün qiymət göstərilmir). Diqqət cəlb etmək məqsədilə real olmayan, simvolik və ya çaşdırıcı qiymət göstərmək qadağandır. Zəng zamanı elanda göstəriləndən fərqli qiymət bildirildiyi aşkar edilərsə, elan silinə bilər.

4.5. İpoteka və çıxarış (kupça) seçimləri əmlakın faktiki vəziyyətinə uyğun qeyd edilməlidir.

4.6. “Əmlak haqqında” bölməsində əlaqə məlumatları, xarici keçidlər, reklam, digər obyektlərin təsviri və əmlaka aid olmayan məlumatlar yerləşdirilə bilməz. Belə elanlar dərc olunmur və ya silinir.

4.7. Elan mətnində yalan və ya çaşdırıcı məlumatlara, əxlaqa zidd və ya qanunsuz məzmuna yol verilmir.

4.8. Elan mətni yalnız böyük hərflərlə yazıla bilməz.

4.9. Administrasiya elan mətnindəki orfoqrafik səhvləri mənanı dəyişmədən düzəldə bilər.

4.10. Tikinti kompleksinin birbaşa satışda olan (ilkin bazar) mənzilləri barədə elanları yalnız həmin kompleks və ya kompleksin rəsmi razılığı olan İstifadəçi yerləşdirə bilər.

5. Şəkillər və video

5.1. Şəkillər real olmalı və elanda göstərilən əmlaka aid olmalıdır. Keyfiyyətli və aydın şəkillər tövsiyə olunur.

5.2. Hər elana maksimum 30 şəkil əlavə edilə bilər. Qəbul olunan formatlar: JPG, PNG, GIF, WEBP, HEIC. Bir şəklin həcmi 50 MB-dan çox olmamalıdır.

5.3. İlk şəkil elanın əsas şəkli kimi Platformanın ön səhifəsində və siyahılarda göstərilir. Bu şəkil əmlakın əsas və təmsilçi görünüşünü əks etdirməlidir; sanitar qovşaq, balkon, küçə və ya binanın blokunun görüntüsü əsas şəkil kimi istifadə edilə bilməz.

5.4. Tikinti mərhələsində olan və ya təmirsiz vəziyyətdə təqdim edilən əmlakın elanında binanın fasadının (ön görünüşünün) şəkli məcburidir.

5.5. Aşağıdakı şəkillər qəbul edilmir:

• üzərində reklam yazısı, loqo, qiymət, əlaqə məlumatları, QR kod və ya su nişanı (watermark) olan şəkillər;
• bulanıq şəkillər, ekran görüntüləri (skrinşot) və kollajlar;
• 3D vizuallar və illüstrasiyalar (tikinti mərhələsində olan obyektlər istisna olmaqla);
• başqasına məxsus və icazəsiz götürülmüş şəkillər.

5.6. 5.5-ci bənddəki loqo qadağasından istisna olaraq, tikinti kompleksləri öz elanlarında şəkillərə kompleksin öz loqosunu yerləşdirə bilər.

5.7. Filtr, retuş və digər effektlərdən həddindən artıq istifadə olunmuş şəkillərin qəbulu Administrasiyanın qərarından asılıdır.

5.8. Video link əlavə etmək istəyə bağlıdır. Link yalnız həmin əmlaka aid YouTube, Instagram və ya TikTok videosuna aid olmalıdır.

6. Moderasiya və redaktə

6.1. Yerləşdirilən elan Administrasiya tərəfindən yoxlanılır. Elan təsdiqləndikdə İstifadəçinin e-poçt ünvanına bildiriş göndərilir.

6.2. Elanın redaktəsi və silinməsi yalnız elan sahibi tərəfindən Şəxsi kabinet vasitəsilə həyata keçirilir.

6.3. Yalnız aktiv elan redaktə edilə bilər. Yoxlamada olan elan Administrasiya tərəfindən təsdiqləndikdən sonra redaktə oluna bilər. Arxivdə olan, rədd edilmiş və ya digər səbəbdən aktiv olmayan elan redaktə edilə bilməz.

6.4. Elanın növü (satış/kirayə), əmlakın növü, şəhər, rayon, metro və qəsəbə redaktə edilə bilməz. Bu məlumatları dəyişmək üçün yeni elan yerləşdirilməlidir.

6.5. Qiymət, “Əmlak haqqında” bölməsi, ipoteka və çıxarış seçimləri, əlaqə nömrəsi və elan sahibinin statusu təkrar yoxlama olmadan redaktə edilə bilər.

6.6. Əmlakın parametrləri (sahə, otaq sayı, mərtəbə, təmir və s.), xəritədəki yeri və ya video link dəyişdirildikdə elan təkrar yoxlamaya göndərilir və təsdiqlənənədək Platformada göstərilmir.

6.7. Şəkillər yalnız silinə bilər, lakin elanda ən azı 3 şəkil qalmalıdır. Əsas şəkil silindikdə növbəti şəkil avtomatik olaraq əsas şəkil olur. Yeni şəkil yalnız yeni elan yerləşdirməklə əlavə edilə bilər.

6.8. Qiymət dəyişiklikləri Platformada qeydə alınır və elanın qiymət tarixçəsində əks oluna bilər.

6.9. Redaktə zamanı da bu Qaydaların bütün tələbləri tətbiq olunur. Redaktə yolu ilə elanı başqa əmlaka aid etmək qadağandır; belə elan xəbərdarlıq edilmədən silinə bilər.

7. VIP və İrəli çək xidmətləri

7.1. VIP – elan VIP bölməsində göstərilir və xidmət aktiv olduğu müddətdə hər 8 saatdan bir avtomatik olaraq siyahının yuxarısına çəkilir.

7.2. İrəli çək – xidmət aktiv olduğu müddətdə elan hər 24 saatdan bir avtomatik olaraq siyahının yuxarısına çəkilir.

7.3. VIP və İrəli çək xidmətləri həm ayrılıqda, həm də paralel olaraq istənilən sayda aktivləşdirilə bilər. Hər xidmət öz aktivləşdirilmə vaxtına uyğun cədvəllə işləyir.

7.4. Xidmətlərin müddəti və qiyməti ödəniş pəncərəsində göstərilir. Ödənişli xidmətdən istifadə elanın qaydalara uyğunluğuna zəmanət vermir və qaydaları pozan elanın silinməsinə mane olmur.