İstifadəçi Razılaşması

1. Ümumi müddəalar

1.1. Bu İstifadəçi Razılaşması (bundan sonra – “Razılaşma”) evonline.az internet platformasından (bundan sonra – “Platforma”) istifadə qaydalarını, habelə Administrasiya ilə İstifadəçi arasında yaranan münasibətləri tənzimləyir.

1.2. Qeydiyyatdan keçməklə, daxil olmaqla, elan yerləşdirməklə, ödəniş etməklə və ya Platformaya başqa üsulla məlumat təqdim etməklə İstifadəçi bu Razılaşma ilə tanış olduğunu və onun şərtlərini qəbul etdiyini təsdiq edir. Şərtlərlə razı olmadıqda İstifadəçi Platformadan istifadəni dayandırmalıdır.

1.3. Ödənişli xidmətlərə aid hissədə bu Razılaşma ictimai oferta hesab olunur. Ödənişin həyata keçirilməsi ofertanın qəbulu deməkdir.

1.4. Aşağıdakı sənədlər bu Razılaşmanın ayrılmaz hissəsidir:

• Məxfilik Siyasəti (Əlavə №1) – fərdi məlumatların toplanması, işlənməsi və qorunması qaydaları;
• Elan qaydaları – elanların məzmununa və tərtibatına dair tələblər.

1.5. Hüquqi şəxs və ya fərdi sahibkar adından Platformadan istifadə edildikdə, həmin şəxs bu Razılaşmanın şərtlərini qəbul etmiş sayılır.

1.6. Platformadan istifadə Azərbaycan Respublikasının qüvvədə olan qanunvericiliyi və bu Razılaşma ilə tənzimlənir.

2. Anlayışlar

2.1. Bu Razılaşmada istifadə olunan anlayışlar aşağıdakı mənaları ifadə edir:

• Platforma – https://evonline.az ünvanında fəaliyyət göstərən internet saytı, onun bölmələri, proqram təminatı və məlumat bazası;
• Administrasiya – Platformanı idarə edən və ona dair bütün hüquqlara malik olan şəxs (VÖEN: 1807198742; ünvan: AZ1092, Bakı şəhəri, Sabunçu rayonu, Bakıxanov qəs., Sülh (ərəblinka) küç., ev 1a, mənzil 8);
• İstifadəçi – Platformadan istifadə edən istənilən fiziki və ya hüquqi şəxs, o cümlədən əmlak agentlikləri və tikinti kompleksləri;
• Hesab (Şəxsi kabinet) – İstifadəçinin qeydiyyatdan sonra əldə etdiyi və elanlarını, balansını və xidmətlərini idarə etdiyi fərdi bölmə;
• Elan – İstifadəçinin Platformada yerləşdirdiyi daşınmaz əmlakın (mənzil, həyət evi, torpaq, ofis, obyekt və s.) satışı və ya kirayəsi barədə məlumat;
• Ödənişli xidmət – Platformada haqqı ödənilməklə göstərilən xidmətlər (VIP, İrəli çək, elan paketləri, xidmət paketləri, Vasitəçi paketi və s.);
• Xidmət paketi – əmlak agentlikləri və tikinti kompleksləri üçün nəzərdə tutulmuş, İstifadəçiyə Elan balansı və Ödənişli xidmətlər balansı təqdim edən ödənişli xidmət;
• Vasitəçi paketi – vasitəçilik fəaliyyəti ilə məşğul olan İstifadəçilər üçün nəzərdə tutulmuş, müəyyən müddət ərzində limitsiz elan yerləşdirmə imkanı verən ödənişli xidmət;
• Elan paketi – ödənişli elan sayını artıran və müəyyən sayda elan yerləşdirmə haqqı verən ödənişli xidmət. Elan paketləri fərdi İstifadəçilər, əmlak agentlikləri və tikinti kompleksləri üçün ayrıca təqdim olunur;
• Elan balansı – əmlak agentlikləri və tikinti komplekslərinin elan yerləşdirmək üçün istifadə etdiyi elan limiti. Elan balansı xidmət paketi çərçivəsində təqdim edilən və elan paketləri ilə alınan elan yerləşdirmə sayı hesabına artırılır;
• Ödənişli xidmətlər balansı – xidmət paketi çərçivəsində təqdim edilən və yalnız VIP və İrəli çək xidmətləri üçün istifadə olunan vəsait;
• Balans – İstifadəçinin hesabında AZN ilə ifadə olunan, bank kartı ilə artırılan və bonusların (o cümlədən cashback) əlavə olunduğu, ödənişli xidmətlər üçün istifadə edilən hesab. Elan balansı və Ödənişli xidmətlər balansı bu anlayışa daxil deyil və ayrıca uçota alınır;
• Bonus – Administrasiya tərəfindən İstifadəçinin balansına əlavə olaraq təqdim edilən, nağd pula çevrilməyən və yalnız Platformada müəyyən edilmiş məqsədlər üçün istifadə edilə bilən vəsait (hədiyyə bonusları, paket bonusları və cashback).

3. Qeydiyyat və hesab

3.1. Elan yerləşdirmək üçün hesab tələb olunur. Hesab İstifadəçi tərəfindən əvvəlcədən yaradıla və ya qeydiyyatsız elan yerləşdirilərkən təqdim olunan məlumatlar əsasında avtomatik yaradıla bilər. Bu halda giriş məlumatları İstifadəçinin e-poçt ünvanına göndərilir.

3.2. Hər İstifadəçinin yalnız bir hesabı ola bilər. Eyni şəxs tərəfindən limitləri keçmək məqsədilə bir neçə hesab yaradılması qadağandır.

3.3. İstifadəçi qeydiyyat zamanı doğru məlumat təqdim etməyə borcludur. Administrasiya təqdim olunan məlumatların doğruluğunu yoxlamaq üçün təsdiqedici sənəd tələb edə bilər.

3.4. İstifadəçi şifrəsinin gizli saxlanmasına və hesabı vasitəsilə edilən bütün hərəkətlərə görə məsuliyyət daşıyır. Hesaba icazəsiz giriş şübhəsi olduqda İstifadəçi dərhal şifrəsini dəyişməli və Administrasiyaya məlumat verməlidir.

3.5. Administrasiya İstifadəçinin kimliyinə və təqdim etdiyi məlumatların doğruluğuna zəmanət vermir.

3.6. Hesabı bloklanmış İstifadəçi Administrasiyanın icazəsi olmadan yeni hesab yarada və ya başqa İstifadəçinin hesabından istifadə edə bilməz.

4. Elanların yerləşdirilməsi

4.1. Elanlar bu Razılaşmaya və Elan qaydalarına uyğun olmalıdır.

4.2. İstifadəçi elanda göstərilən əmlakın mülkiyyətçisi olduğunu və ya mülkiyyətçi tərəfindən həmin əmlakı satmaq, kirayəyə vermək və ya reklam etmək üçün səlahiyyətləndirildiyini (o cümlədən əmlak agentliyi kimi) təsdiq edir.

4.3. Elan real mövcud olan əmlaka aid olmalı, doğru və tam məlumat (qiymət, ünvan, sahə, otaq sayı və s.) əks etdirməlidir. Səhv və ya köhnəlmiş məlumat aşkar edildikdə İstifadəçi elanı düzəltməli və ya silməlidir.

4.4. Fərdi İstifadəçilərə ayda 1 ödənişsiz elan haqqı verilir. İstifadə olunmamış ödənişsiz elan haqqı növbəti aya keçmir. Əlavə elanlar üçün fərdi İstifadəçi elan paketlərindən birini seçərək ödənişli elan sayını artıra bilər. Elan paketi ilə alınmış ödənişli elan sayı, paketin təsvirində başqa müddət göstərilmədikdə, müddətsiz qüvvədədir. Ödənişsiz və ödənişli elan sayları İstifadəçinin Şəxsi kabinetində göstərilir. Əmlak agentlikləri və tikinti komplekslərinin xidmət paketi çərçivəsində əldə etdiyi və elan paketləri ilə aldığı ödənişli elan yerləşdirmə sayı onların Elan balansına əlavə olunur.

4.5. Standart elanın aktivlik müddəti 30 gündür və VIP və İrəli çək xidmətləri vasitəsilə uzadıla bilər. Müddət bitdikdən sonra elan arxivə keçir və 90 gün ərzində istifadəçi panelindən elan yerləşdirmə haqqı hesabına yenidən aktivləşdirilə bilər.

4.6. İstifadəçi elana əlavə etdiyi mətn, şəkil və digər materiallara dair bütün zəruri hüquqlara malik olduğunu təsdiq edir. Başqasına məxsus şəkillərin icazəsiz istifadəsi qadağandır.

4.7. İstifadəçi elan materiallarından Platformanın fəaliyyəti və tanıdılması məqsədilə (elanın göstərilməsi, axtarışda və sosial şəbəkələrdə nümayişi və s.) istifadə üçün Administrasiyaya pulsuz, qeyri-müstəsna hüquq verir. Materiallara dair müəllif hüquqları İstifadəçidə qalır.

4.8. Administrasiya elanları moderasiya etmək, onların kateqoriyasını dəyişmək, redaktə etmək, dərcini dayandırmaq və ya yerləşdirilməsindən imtina etmək hüququna malikdir. Zəruri hallarda Administrasiya elanla bağlı əlavə sənəd tələb edə və sənəd təqdim olunanadək elanın dərcini saxlaya bilər.

4.9. Administrasiya Platformanın keyfiyyətini qorumaq üçün bir İstifadəçinin aktiv elanlarının sayını məhdudlaşdıra bilər.

4.10. Əmlakla bağlı bütün sövdələşmələr İstifadəçilər arasında birbaşa bağlanır. Administrasiya sövdələşmənin tərəfi, vasitəçisi və ya zamini deyil.

5. Qadağan olunan hərəkətlər

5.1. Platformada aşağıdakılar qadağandır:

• mövcud olmayan, artıq satılmış və ya kirayəyə verilmiş əmlak barədə elan yerləşdirmək;
• istifadəçiləri aldatmaq məqsədilə real olmayan qiymət, ünvan və ya digər yanlış məlumat göstərmək;
• eyni əmlak barədə təkrar elanlar yerləşdirmək;
• fırıldaqçılıq, dələduzluq və ya qanunsuz sövdələşmələrə yönəlmiş hərəkətlər etmək;
• başqa şəxslərin şərəf və ləyaqətini alçaldan, təhqiredici, ədəbsiz və ya ayrıseçkilik xarakterli məzmun paylaşmaq;
• elanlarda başqa saytlara keçidlər yerləşdirmək və ya digər elan platformalarını reklam etmək;
• İstifadəçilərə spam, kütləvi və ya istənilməyən mesajlar göndərmək;
• Platformadan məlumatların avtomatik toplanması (parsing), botlar və ya digər avtomatlaşdırılmış vasitələrlə istifadə etmək;
• Platformanın işini pozmağa, ona həddindən artıq yük yaratmağa və ya təhlükəsizlik sistemlərindən yayınmağa cəhd etmək;
• zərərli proqram təminatı (virus və s.) yaymaq;
• moderatorlar və Administrasiya barədə təhqiramiz və ya qərəzli yazılar paylaşmaq.

5.2. Qaydaların pozulması aşkar edildikdə Administrasiya elanı silmək, hesabı müvəqqəti və ya birdəfəlik bloklamaq hüququna malikdir. Qaydaların pozulması səbəbindən silinən elan və ya bloklanan hesab üzrə ödənilmiş xidmət haqqı, qanunvericiliklə nəzərdə tutulan hallar və bu Razılaşmanın 8-ci bölməsində göstərilən geri qaytarma halları istisna olmaqla, geri qaytarılmır.

5.3. Hüquqları başqa İstifadəçi tərəfindən pozulan şəxs (məsələn, şəkillərinin icazəsiz istifadəsi) elandakı “Şikayət et” funksiyası və ya [email protected] ünvanı vasitəsilə müraciət edə bilər. Əsaslı şikayətlər üzrə Administrasiya pozuntunun aradan qaldırılması üçün tədbir görür.

6. Ödənişli xidmətlər

6.1. Platformada aşağıdakı ödənişli xidmətlər təqdim olunur:

• İrəli çək – elanın siyahıda yuxarı qaldırılması;
• VIP – elanın xüsusi bölmədə və vurğulanmış formada göstərilməsi;
• Elan paketləri – aylıq ödənişsiz limitdən artıq elan yerləşdirmək üçün ödənişli elan sayının artırılması;
• Xidmət paketləri – əmlak agentlikləri və tikinti kompleksləri üçün paketlər;
• Vasitəçi paketi – vasitəçilər üçün 30 günlük limitsiz elan paketi.

6.2. Xidmətlərin qiymətləri, müddətləri və şərtləri Platformanın müvafiq səhifələrində və ödəniş pəncərəsində göstərilir. Administrasiya qiymətləri dəyişə bilər; dəyişiklik artıq ödənilmiş xidmətlərə şamil edilmir.

6.3. Ödənişli xidmətlərin haqqı Visa və Mastercard bank kartları ilə (bank və ya lisenziyalı ödəniş təşkilatının təhlükəsiz ödəniş səhifəsi vasitəsilə) və ya, xidmətin şərtləri imkan verdikdə, Balans hesabına ödənilə bilər. Xidmət paketi çərçivəsində təqdim edilən Ödənişli xidmətlər balansı yalnız VIP və İrəli çək xidmətləri üçün istifadə olunur. Vasitəçi paketi yalnız bank kartı ilə ödənilir. Hər xidmət üçün mümkün ödəniş üsulları ödəniş pəncərəsində göstərilir. Xidmət ödəniş təsdiqləndikdən sonra dərhal aktivləşir.

6.4. Əmlak agentlikləri və tikinti kompleksləri üçün nəzərdə tutulan xidmət paketləri, paketin təsvirində başqa müddət göstərilmədikdə, müddətsiz təqdim olunur. Paket alındıqda İstifadəçiyə paket şərtlərinə uyğun olaraq Elan balansı və Ödənişli xidmətlər balansı təqdim edilir. Bu balanslar üçün ayrıca müddət müəyyən edilmədikdə, onlar müddətsiz olaraq İstifadəçinin hesabında saxlanılır. Elan balansı və Ödənişli xidmətlər balansı yalnız Platformada nəzərdə tutulmuş məqsədlər üçün istifadə olunur, nağd pula çevrilmir və başqa İstifadəçiyə ötürülmür. Paket aktivləşdirildikdən sonra paket haqqı geri qaytarılmır, bu Razılaşmanın 8.1-ci bəndində göstərilən hallar və qanunvericiliklə nəzərdə tutulmuş hallar istisna olmaqla. Vasitəçi paketi isə aktivləşdirildiyi tarixdən etibarən 30 gün qüvvədədir və avtomatik yenilənmir.

6.5. Ödənişli xidmətdən istifadə elanın qaydalara uyğunluğuna zəmanət vermir və qaydaları pozan elanın silinməsinə mane olmur.

7. Balans, bonuslar və cashback

7.1. Balans yalnız Platformanın ödənişli xidmətləri üçün istifadə oluna bilər. Balansdakı vəsait başqa İstifadəçiyə ötürülmür və ona faiz hesablanmır. İstifadəçi tərəfindən ödəniş yolu ilə balansa əlavə edilmiş vəsaitlərin geri qaytarılması İstifadəçinin müraciəti əsasında, bu Razılaşmanın 8.3–8.4-cü bəndlərində göstərilən qaydada və tətbiq olunan qanunvericiliyə uyğun həyata keçirilir. Bonus və cashback məbləğləri nağd pula çevrilmir. Hesablamalarda 1 balans vahidi 1 AZN-ə bərabərdir.

7.2. Hədiyyə bonusları və paket bonusları Administrasiyanın qərarı ilə balansa əlavə edilə bilər. Paket bonusları paket alan İstifadəçilərə paketin əsas şərtlərindən əlavə olaraq təqdim edilir və onların verilməsi Administrasiyanın öhdəliyi deyil. Onların etibarlılıq müddəti Administrasiya tərəfindən müəyyən edilir və müddət bitdikdə istifadə olunmamış bonuslar silinir. Xidmət paketi çərçivəsində təqdim edilən Elan balansı və Ödənişli xidmətlər balansının müddəti 6.4-cü bəndə uyğun müəyyən edilir.

7.3. Cashback yalnız Vasitəçi paketinə şamil edilir: paket üçün ödənilmiş məbləğ bonus kimi İstifadəçinin balansına qaytarılır və VIP, İrəli çək kimi ödənişli xidmətlər üçün istifadə oluna bilər. Cashback nağd pula çevrilmir.

7.4. Hesab İstifadəçi tərəfindən silindikdə və ya qaydaların pozulmasına görə birdəfəlik bloklandıqda hesab üzrə təqdim edilmiş bonuslar (hədiyyə bonusları, paket bonusları və cashback) və qanunvericiliklə və ya bu Razılaşmanın 8-ci bölməsi ilə geri qaytarılması nəzərdə tutulmayan aktiv xidmətlər ləğv edilə bilər.

7.5. İstifadəçinin bank kartı ilə balansa əlavə etdiyi və istifadə olunmamış vəsait hesab silinməzdən əvvəl ödənişli xidmətlər üçün istifadə edilə bilər. Hesabın silinməsi barədə müraciət zamanı Administrasiya İstifadəçini balansda qalan vəsait barədə məlumatlandırır. Bu vəsaitin geri qaytarılması İstifadəçinin müraciəti əsasında, bu Razılaşmanın 8.3–8.4-cü bəndlərinə və qanunvericiliyə uyğun həyata keçirilir.

7.6. Bu bölmənin müddəaları İstifadəçinin qanunvericiliklə nəzərdə tutulmuş geri qaytarma və digər hüquqlarına təsir etmir.

8. Ödənişin geri qaytarılması

8.1. Ödəniş aşağıdakı hallarda geri qaytarıla bilər:

• texniki xəta – vəsait İstifadəçinin bank kartından çıxıldığı halda ödənilmiş xidmət aktivləşməyib;
• ikiqat ödəniş – eyni xidmət üçün ödəniş iki və ya daha çox dəfə tutulub;
• Administrasiyanın səhvi – qaydalara uyğun ödənişli elan və ya xidmət Administrasiya tərəfindən səhvən silinib və ya deaktiv edilib.

Bu hallarda ilk növbədə xidmət bərpa edilir. Xidmətin bərpası texniki və ya digər səbəbdən mümkün olmadıqda ödənilmiş məbləğ geri qaytarılır.

8.2. Aşağıdakı hallarda ödəniş geri qaytarılmır:

• xidmət paketi, elan paketi və ya Vasitəçi paketi aktivləşdirilib;
• VIP, İrəli çək və digər ödənişli xidmət aktivləşdirildikdən sonra faktiki istifadə olunub və ya xidmətin icrasına başlanılıb;
• elan İstifadəçinin bu Razılaşmanı və ya Elan qaydalarını pozması səbəbindən silinib və ya hesab bloklanıb;
• İstifadəçi xidmət aktivləşdirildikdən və ya istifadə olunmağa başlandıqdan sonra yalnız fikrini dəyişdiyi üçün ödənişin geri qaytarılmasını tələb edir;
• bonus, cashback və digər kampaniya çərçivəsində təqdim edilmiş vəsaitlər (bu vəsaitlər nağdlaşdırılmır).

8.3. Ödənişin geri qaytarılması ilə bağlı İstifadəçi [email protected] ünvanına müraciət edə bilər. Müraciətdə hesabın e-poçt ünvanı, ödəniş tarixi, ödənilmiş məbləğ, mümkün olduqda əməliyyat nömrəsi və müraciətin səbəbi göstərilməlidir.

8.4. Administrasiya müraciəti ağlabatan müddətdə araşdırır və qərarı müraciətin faktları, xidmətin istifadə vəziyyəti və qüvvədə olan qanunvericiliyin tələbləri əsasında qəbul edir. Geri qaytarılması təsdiqlənmiş məbləğ, bir qayda olaraq, ödənişin edildiyi bank kartına qaytarılır; vəsaitin karta daxil olma müddəti bankdan və ödəniş xidməti təminatçısından asılıdır.

8.5. Vasitəçi paketinin haqqı geri qaytarıldıqda həmin paket üzrə İstifadəçinin balansına əlavə edilmiş cashback məbləği müvafiq məbləğdə balansdan çıxılır.

8.6. Bu bölmədə nəzərdə tutulan müddəalar Azərbaycan Respublikasının qüvvədə olan qanunvericiliyində istehlakçıya verilmiş hüquqları məhdudlaşdırmır.

9. Kommunikasiya

9.1. Administrasiya İstifadəçinin e-poçt ünvanına və telefon nömrəsinə hesab, elanlar və ödənişlərlə bağlı xidməti bildirişlər göndərə bilər.

9.2. Yeniliklər və kampaniyalar barədə məlumat xarakterli mesajlar da göndərilə bilər. İstifadəçi istənilən vaxt [email protected] ünvanına yazaraq bu mesajlardan imtina edə bilər. Xidməti bildirişlər bu imtinaya daxil deyil.

9.3. Mesajların göndərilməsi üçün İstifadəçinin əlaqə məlumatları yalnız e-poçt və SMS göndəriş xidmətləri təminatçılarına, Məxfilik Siyasətində göstərilən qaydada ötürülə bilər.

9.4. Elanda göstərilən əlaqə məlumatları bütün ziyarətçilər üçün açıqdır. Administrasiya digər İstifadəçilərin və ya üçüncü şəxslərin bu məlumatlardan istifadəsinə (o cümlədən spam zənglər və mesajlar) görə məsuliyyət daşımır.

9.5. Administrasiya ilə yazışmalar Platformada göstərilən rəsmi əlaqə kanalları vasitəsilə aparılır.

10. Əqli mülkiyyət

10.1. Platformanın dizaynı, proqram təminatı, loqosu, məlumat bazası və digər materialları Administrasiyaya məxsusdur və qanunla qorunur.

10.2. Administrasiyanın yazılı icazəsi olmadan Platformanın materiallarının və məlumat bazasının surətini çıxarmaq, yaymaq, satmaq, dəyişdirmək və ya proqram təminatının mənbə koduna müdaxilə etmək qadağandır.

10.3. Bu hüquqların pozulması qanunvericiliyə uyğun olaraq mülki, inzibati və ya cinayət məsuliyyətinə səbəb ola bilər.

11. Məsuliyyətin məhdudlaşdırılması

11.1. İstifadəçi Platformada yerləşdirdiyi elanların, məlumatların, fotoşəkillərin, sənədlərin və digər materialların məzmununa, düzgünlüyünə və qanuniliyinə görə məsuliyyət daşıyır.

11.2. Administrasiya Platformada yerləşdirilən elanların bütün məlumatlarını əvvəlcədən və tam şəkildə yoxlamaq öhdəliyi daşımır. Administrasiya elanlarda göstərilən məlumatların doğruluğuna, əmlakın hüquqi vəziyyətinə, mülkiyyət hüquqlarına, sənədlərinin həqiqiliyinə, əmlakın faktiki vəziyyətinə, keyfiyyətinə və elanda göstərilən təsvirə uyğunluğuna zəmanət vermir. İstifadəçi sövdələşmə barədə qərarı müstəqil qəbul edir və sövdələşmədən əvvəl əmlakın sənədlərinin, hüquqi vəziyyətinin və digər mühüm məlumatların müvafiq qaydada yoxlanılmasına özü cavabdehdir.

11.3. Administrasiya, qanunvericiliyin yol verdiyi həddə, İstifadəçilər arasında bağlanan sövdələşmələrə, həmin sövdələşmələrin icra edilməməsinə və ya lazımi qaydada icra edilməməsinə görə məsuliyyət daşımır. Belə mübahisələr, qanunvericiliklə başqa hal nəzərdə tutulmadıqda, müvafiq İstifadəçilər arasında həll edilir.

11.4. Administrasiya üçüncü şəxslərin Platformaya icazəsiz müdaxiləsi, internet bağlantısında yaranan fasilələr, texniki nasazlıqlar, rabitə problemləri, ödəniş sistemlərinin və ya digər xidmət təminatçılarının işində yaranan fasilələr nəticəsində baş verən zərərə görə, həmin hallar Administrasiyanın təqsirindən irəli gəlmədiyi halda, məsuliyyət daşımır.

11.5. Qanunvericiliyin yol verdiyi həddə Administrasiyanın İstifadəçi qarşısında məsuliyyəti yalnız Administrasiyanın göstərdiyi xidmətlə birbaşa bağlı olan və Administrasiyanın təqsiri nəticəsində yaranmış zərərlə məhdudlaşır və belə məsuliyyət İstifadəçinin müvafiq xidmət üçün faktiki ödədiyi məbləğdən artıq ola bilməz.

11.6. Tərəflərin iradəsindən asılı olmayan və öhdəliklərin icrasını obyektiv olaraq mümkünsüz edən qarşısıalınmaz qüvvə halları (təbii fəlakət, yanğın, müharibə, fövqəladə hallar, dövlət orqanlarının öhdəliklərin icrasına birbaşa təsir edən qərarları və digər analoji hallar) nəticəsində öhdəliklərin icra edilməməsinə və ya gecikdirilməsinə görə tərəflər qanunvericiliyin yol verdiyi həddə məsuliyyətdən azad olunurlar.

11.7. Platformada Administrasiyaya və ya üçüncü şəxslərə məxsus reklamlar yerləşdirilə bilər. Üçüncü şəxslərin reklamlarında göstərilən məlumatların düzgünlüyünə və reklam məzmununa görə, qanunvericiliklə başqa hal nəzərdə tutulmadıqda, reklamverən məsuliyyət daşıyır. Reklamın Platformada yerləşdirilməsi Administrasiyanın reklamverənə və ya reklamda göstərilən məhsul və ya xidmətə dair zəmanət verdiyi anlamına gəlmir.

11.8. Bu bölmənin müddəaları Azərbaycan Respublikasının qüvvədə olan qanunvericiliyinə uyğun tətbiq edilir və İstifadəçiyə qanunvericiliklə verilmiş hüquqları məhdudlaşdırmır.

12. Razılaşmanın müddəti və xitamı

12.1. Razılaşma İstifadəçi tərəfindən qəbul edildiyi andan qüvvəyə minir və müddətsizdir.

12.2. İstifadəçi istənilən vaxt Platformadan istifadəni dayandıra və [email protected] ünvanına yazaraq hesabının silinməsini tələb edə bilər. Hesabın silinməsinin balans, bonuslar və xidmətlərə təsiri 7.4–7.6-cı bəndlərdə göstərilir.

12.3. Administrasiya bu Razılaşmanın, Elan qaydalarının və ya qanunvericiliyin pozulması halında İstifadəçinin hesabını əvvəlcədən xəbərdarlıq etmədən məhdudlaşdıra, bloklaya və ya elanlarını silə bilər.

13. Razılaşmaya dəyişikliklər

13.1. Administrasiya bu Razılaşmaya dəyişiklik etmək hüququna malikdir. Yenilənmiş versiya bu səhifədə dərc olunur və səhifənin yuxarısında “Son yenilənmə” tarixi dəyişdirilir.

13.2. Əhəmiyyətli dəyişikliklər barədə İstifadəçilər Platformada bildiriş və ya e-poçt vasitəsilə əvvəlcədən məlumatlandırılır.

13.3. Dəyişikliklər dərc olunduğu andan qüvvəyə minir. Dəyişikliklərdən sonra Platformadan istifadəni davam etdirmək yenilənmiş Razılaşmanın qəbul edilməsi deməkdir.

14. Yekun müddəalar

14.1. Razılaşma ilə bağlı mübahisələr ilk növbədə danışıqlar yolu ilə həll edilir. Razılığa gəlinmədikdə mübahisələr Azərbaycan Respublikasının qanunvericiliyinə uyğun olaraq məhkəmə qaydasında həll olunur.

14.2. Razılaşmanın hər hansı müddəasının etibarsız hesab edilməsi digər müddəaların qüvvəsinə təsir etmir.

14.3. Administrasiyanın pozuntuya dərhal reaksiya verməməsi onu gələcəkdə öz hüquqlarını müdafiə etmək imkanından məhrum etmir.

14.4. Bu Razılaşma Administrasiya ilə İstifadəçi arasında əmək, agentlik, tərəfdaşlıq və ya birgə fəaliyyət münasibətləri yaratmır.

14.5. Razılaşma ilə bağlı suallar, şikayətlər və geri qaytarma müraciətləri üçün: [email protected], +994 50 287 58 28.