Bakıda 150-dək binanın sökülməsi planlaşdırılır – sakinlərə 600 manat kirayə ödənişi verilə bilər

Bakının bir sıra rayonlarında köhnə və qəzalı binaların mərhələli şəkildə sökülməsi gündəmdədir. Sabunçu, Binəqədi və Suraxanı rayonlarında 150-dək binanın sökülməsi planlaşdırılır.

Məlumata görə, bəzi binalarda artıq söküntü işlərinə başlanılıb. Digər ərazilərdə isə inventarlaşdırma, qiymətləndirmə və söküləcək binaların siyahısının hazırlanması ilə bağlı işlər aparılır.

Qiymətləndiricilər Cəmiyyəti İdarə Heyətinin sədri Vüqar Orucun Oxu.Az-a verdiyi açıqlamaya istinadən, binanın sökülməsi üçün əvvəlcə müvafiq dövlət qurumlarının birgə yaratdığı komissiyanın rəyi əsasında onun qəzalı və ya istismar müddətini başa vurmuş bina kimi müəyyənləşdirilməsi tələb olunur.

Bundan sonra binanın qeydiyyata alınması, mənzillərin sahəsi və digər xüsusiyyətlərinin müəyyənləşdirilməsi, eləcə də layihənin həyata keçirilməsi üçün müvafiq prosedurların aparılması nəzərdə tutulur.

Sökülən binanın yerində yeni yaşayış binası inşa ediləcəyi təqdirdə sakinlərə aylıq 600 manat kirayə ödənişi verilməsi mümkündür. Ərazidə yeni bina tikilməyəcəyi və abadlaşdırma və ya dövlət layihəsi həyata keçiriləcəyi halda isə vətəndaşlara kompensasiya ödənilməsi nəzərdə tutulur.

Vüqar Orucun sözlərinə görə, söküntü işlərinin hansı binalardan başlayacağı Bakı şəhərinin 2040-cı ilədək inkişafına dair Baş planına uyğun olaraq mərhələli şəkildə müəyyənləşdiriləcək. Bu prosesdə müvafiq icra hakimiyyəti orqanları və investorlar arasında razılaşmalar da nəzərə alınacaq.

Kompensasiyaların məbləğinin isə ərazidəki bazar qiymətlərindən asılı olaraq təxminən 1 000–3 000 manat aralığında dəyişə biləcəyi bildirilib. Siyahıya fərdi yaşayış evləri və yataqxanaların da daxil olduğu qeyd olunub.

Qeyd edək ki, bu məlumatlar Oxu.Az-ın Vüqar Orucun açıqlamasına əsaslanan məlumatları əsasında hazırlanıb. Azərbaycanda daşınmaz əmlak bazarındakı yenilikləri və aktual elanları isə Evonline.az üzərindən izləyə bilərsiniz.