Sənədsiz ev avtomatik qanunsuz tikili sayılır? Ekspertdən açıqlama

Daşınmaz əmlak bazarında sənədsiz evlərlə bağlı əsas suallardan biri belə tikililərin avtomatik olaraq qanunsuz hesab edilib-edilməməsidir. Ekspertin sözlərinə görə, tikilinin sənədsiz olması onun avtomatik olaraq qanunsuz tikili olması demək deyil.

Evonline.az xəbər verir ki, mövzu ilə bağlı BiG.AZ-a açıqlama verən əmlak məsələləri üzrə ekspert Fərid Cəfərli bildirib ki, belə hallarda bir neçə hüquqi və texniki məqam ayrıca araşdırılmalıdır.

O, qeyd edib ki, kollektorların üzərində və ya onların mühafizə zonalarında inşa edilmiş evlərə gəldikdə isə məsələ daha həssas xarakter daşıyır. Çünki burada söhbət yalnız mülkiyyət hüququndan deyil, eyni zamanda mühəndis-kommunikasiya sistemlərinin təhlükəsiz istismarından, insanların həyat və sağlamlığının qorunmasından gedir. Kollektorların fəaliyyəti üçün zəruri olan ərazilərdə tikinti işlərinin aparılması gələcəkdə həm texniki problemlərə, həm də fövqəladə hallar zamanı həmin infrastruktura çıxışın məhdudlaşmasına səbəb ola bilər:

"Əsas məsələ vətəndaşların hüquqlarının qorunması ilə şəhərsalma və təhlükəsizlik tələbləri arasında hüquqi balansın təmin edilməsidir. Dövlət qurumlarının qarşısında duran vəzifə yalnız pozuntunu müəyyən etmək deyil, eyni zamanda problemin qanuni həll mexanizmlərini araşdırmaq və vətəndaşlara aydın hüquqi istiqamət verməkdir.
Vətəndaşlara da tövsiyə olunur ki, sənədləşmə məsələsində yalnız şifahi məlumatlara və ya qeyri-rəsmi razılaşmalara əsaslanmasınlar. Torpaq sahəsinin və tikilinin hüquqi vəziyyəti müvafiq dövlət orqanlarından əldə edilən rəsmi məlumatlar əsasında dəqiqləşdirilməlidir.

Nəticə etibarilə, sənədsiz və kollektorların üzərində inşa edilmiş evlərlə bağlı vahid yanaşma tətbiq etmək əvəzinə, hər bir konkret ərazinin və tikilinin hüquqi və texniki vəziyyəti ayrıca qiymətləndirilməlidir. Burada əsas məqsəd bir tərəfdən qanunvericiliyin tələblərinə riayət etmək, digər tərəfdən isə uzun illər bu ərazilərdə yaşayan insanların hüquqi vəziyyətinin mümkün qədər şəffaf və qanuni mexanizmlərlə həllinə şərait yaratmaqdır".