Satmaq öhdəliyi ilə kirayə mənzillərə müraciətlər dayandırıldı – İKZF açıqladı

Satmaq öhdəliyi ilə kirayə mənzil mexanizmi üzrə yeni müraciətlərin qəbulu 6 oktyabr 2026-cı il tarixindən müvəqqəti dayandırılır.

Evonline.az xəbər verir ki, bu barədə İpoteka və Kredit Zəmanət Fondu (İKZF) məlumat yayıb.

İKZF-nin bildirdiyinə görə, qərar satmaq öhdəliyi ilə kirayə mənzil mexanizmindən yararlanmaq istəyən vətəndaşların müraciətlərinin daha operativ qəbul edilməsi, şəffaf şəkildə emal və qiymətləndirilməsi, eləcə də elektron sistemin funksionallığının artırılması məqsədilə qəbul edilib.

Məlumata əsasən, son dövrdə satmaq öhdəliyi ilə kirayə mənzil almaq istəyən vətəndaşların sayında ciddi artım müşahidə olunur. “Elektron ipoteka və kredit zəmanət” sistemi vasitəsilə hər gün 100-dən çox müraciət qeydə alınır. Bu səbəbdən görüş vaxtı təyin edilmiş müraciətlərin sayı seçim üçün mövcud olan mənzillərin sayını dəfələrlə üstələyib.

12 mindən çox vətəndaşa görüş günü təyin edilib

İKZF bildirir ki, müraciətlərin 6 oktyabr 2026-cı ildən müvəqqəti dayandırılması həmin tarixədək elektron sistemdə qeydiyyata alınmış müraciətlərə, onların növbəliliyinə və bu müraciətlər üzrə həyata keçirilən prosedurlara təsir göstərməyəcək.

İndiyədək müraciət etmiş 12 mindən çox vətəndaşın şəxsi kabinetinə görüş günü barədə bildiriş göndərilib. Həmin şəxslər bildirişdə göstərilən tarixdə 2 saylı ASAN Kommunal və ya Sumqayıt ASAN Xidmət mərkəzlərinə müraciətlərini rəsmiləşdirmək üçün yaxınlaşa biləcəklər.

10 mindən çox kirayə müqaviləsi rəsmiləşdirilib

İKZF-nin məlumatına görə, satmaq öhdəliyi ilə kirayə mexanizmi Azərbaycan Prezidentinin 25 yanvar 2019-cu il tarixli 488 nömrəli Fərmanına uyğun həyata keçirilir.

2020–2026-cı illər ərzində Bakı və Sumqayıt şəhərlərində, həmçinin Abşeron rayonunda yerləşən 17 müxtəlif yaşayış kompleksində tam təmirli mənzillər vətəndaşlara təqdim edilib.

Bu müddət ərzində 10 mindən çox kirayə müqaviləsi rəsmiləşdirilib.

Müraciətlərin qəbulunun nə vaxt bərpa ediləcəyi barədə əlavə məlumatın ictimaiyyətə açıqlanacağı bildirilib.

Mənbə: İpoteka və Kredit Zəmanət Fondu (İKZF)