Bələdiyyə sənədi ilə evə çıxarış necə alınır? 5 əsas mərhələ

Bələdiyyə sənədi əsasında evə çıxarış almaq istəyən vətəndaşlar üçün proses bir neçə hüquqi və texniki mərhələdən ibarətdir. Evonline.az xəbər verir ki, BiG.AZ-a açıqlamasında əmlak məsələləri üzrə ekspert Fərid Cəfərli bələdiyyə sənədi ilə evə çıxarış alınması üçün həyata keçirilməli əsas prosedurları açıqlayıb. Ekspertin sözlərinə görə, bu zaman həm torpaq sahəsinin hüquqi statusu, həm də üzərində yerləşən tikilinin sənədləri və hüquqi vəziyyəti diqqətlə yoxlanılmalıdır.

Əmlak məsələləri üzrə ekspert Fərid Cəfərli bildirib ki, birinci mərhələ ilkin hüquqi yoxlama prosesidir. Bələdiyyə sənədinin hansı tarixdə, hansı bələdiyyə tərəfindən və hansı hüquqi əsasla verildiyi araşdırılır. Torpaq sahəsinin bələdiyyənin sərəncamında olub-olmaması, kateqoriyası, təyinatı və əvvəlki hüquq sahibi ilə bağlı məlumatlar mütləq yoxlanılır. Eyni zamanda, həmin torpaq sahəsi üzrə dövlət reyestrində qeydiyyatın olub-olmaması, eləcə də hər hansı məhdudiyyətin (məhkəmə mübahisəsi) və ya yüklülüyün (ipoteka, girov və s.) mövcudluğu araşdırılmalıdır:

"İkinci mərhələ torpaq hüququnun rəsmiləşdirilməsidir. Əgər bələdiyyə sənədi torpaq sahəsinə mülkiyyət və ya digər qanuni hüququ təsdiq edən əsas kimi qəbul edilirsə, həmin hüququn dövlət qeydiyyatına alınması üçün tələb olunan sənədlər hazırlanır. Bu mərhələdə torpaq sahəsinin planı və ölçüsü, bələdiyyə qərarı və digər hüquq müəyyənedici sənədlər mühüm əhəmiyyət daşıyır.

Üçüncü mərhələdə tikilinin hüquqi vəziyyəti müəyyənləşdirilir. Torpaq sahəsinə dair sənədin mövcudluğu avtomatik olaraq evə çıxarış verilməsi demək deyil. Evin ayrıca daşınmaz əmlak kimi hüquqi statusu müəyyənləşdirilməlidir. Bu məqsədlə tikilinin nə vaxt inşa edildiyi, tikinti üçün tələb olunan hüquqi əsasların mövcudluğu, texniki göstəriciləri və mövcud tikilinin torpaq sahəsinə uyğunluğu araşdırılır.

Dördüncü mərhələ texniki sənədləşmədir. Zəruri hallarda evin texniki inventarlaşdırılması aparılır, onun texniki göstəriciləri və planlaşdırma məlumatları hazırlanır. Bu mərhələdə faktiki vəziyyətlə təqdim olunan sənədlərin uyğunluğu xüsusi əhəmiyyət daşıyır.

Beşinci mərhələdə isə dövlət qeydiyyatı həyata keçirilir. Sənədlər tam şəkildə hazırlandıqdan sonra daşınmaz əmlak üzərində hüququn dövlət qeydiyyatına alınması üçün aidiyyəti dövlət qeydiyyatı orqanına müraciət edilir. Hüquqi əsaslar və təqdim olunan sənədlər qanunvericiliyin tələblərinə uyğun olduqda, ev və torpaq sahəsi üzrə müvafiq dövlət qeydiyyatı aparılır və nəticədə çıxarış əldə edilir".