Sənədsiz evlər üçün çıxarış almaq mümkün olacaq: 6 sənəd rəsmi əsas kimi tanındı.

Azərbaycanda sənədsiz fərdi yaşayış evlərinin sənədləşdirilməsi istiqamətində yeni mərhələ başlayır.
Yeni qaydalara əsasən müəyyən sənədləri olan vətəndaşlar öz evlərinə çıxarış (kupça) ala biləcəklər.
Bu barədə Milli Məclisdə müzakirə edilən Nazirlər Kabinetinin 2025-ci il üzrə fəaliyyət hesabatında məlumat verilib.Bildirilib ki, fərdi yaşayış evləri üzərində mülkiyyət hüququnun qeydiyyatı prosesinin sadələşdirilməsi məqsədilə bir sıra sənədlərə rəsmi hüquqi status verilib.Yeni qaydalara əsasən artıq 6 növ sənəd fərdi yaşayış evlərinə çıxarış almaq üçün hüquqi əsas hesab olunur.
Həmin sənədlər aşağıdakılardır:

• Texniki pasportlar – 1 yanvar 2001-ci ilədək texniki inventarlaşdırma orqanları tərəfindən verilmiş sənədlər;


• Torpaq sahəsinin ayrılması barədə qərarlar – yerli icra hakimiyyəti nümayəndələrinin 1 yanvar 2001-ci ilədək qəbul etdiyi inzibati qərarlar;


• Dövlət müəssisələrinin əmrləri – sovxoz və kolxoz olmayan dövlət qurumlarının torpaq sahəsi ilə bağlı verdiyi əmrlər;


• SSRİ dövrünə aid qərarlar – yaşayış evinin və ya mənzilin mülkiyyətə verilməsi haqqında zəhmətkeş deputatları sovetlərinin qərarları;


• Yenidənqurma ilə bağlı qərarlar – köhnə yaşayış evinin sökülərək yerində fərdi yaşayış evinin tikilməsi barədə icra hakimiyyəti tərəfindən təsdiqlənmiş layihələr;


• Təsərrüfatbaşına kitablardan çıxarışlar – yaşayış evləri və torpaq sahələrinə dair arxiv sənədləri əsasında verilmiş arayışlar.

Rəsmi məlumatlara görə, ölkədə qeydiyyatsız olan minlərlə tikili artıq dövlət tərəfindən uçota alınaraq qeydiyyata daxil edilir. Belə ki, 9715 qeydiyyatsız obyekt uçota alınıb, onların 5461-nin istismarına icazə verilib.Bu prosesin davam etdirilməsi məqsədilə müraciət müddəti 2026-cı ilə qədər uzadılıb.
Hazırda İqtisadiyyat Nazirliyində yaradılmış işçi qrup tərəfindən özbaşına tikililərlə bağlı məsələlərin tənzimlənməsi və sənədsiz fərdi yaşayış evlərinin leqallaşdırılması istiqamətində yeni təkliflər hazırlanır.