Bazar qiymətindən xeyli ucuz mənzillər satışdadır – kvadratı 435 manatdan başlayır

Azərbaycanda dövlət layihəsi çərçivəsində bazar qiymətlərindən daha aşağı qiymətə yeni mənzillərin satışı davam edir.
Evonline.az nazirliyə istinadən xəbər verir ki, Əmək və Əhalinin Sosial Müdafiəsi Nazirliyi tərəfindən həyata keçirilən sosial layihə çərçivəsində satışa çıxarılan mənzillərin 1 kvadratmetrinin qiyməti 435–830 manat aralığında dəyişir.
Satışa təqdim olunan mənzillər Bakının Ümid qəsəbəsində, həmçinin Abşeron və Samux rayonlarında yerləşən yeni yaşayış komplekslərində yerləşir. Mənzillərin əsas xüsusiyyətləri bunlardır:

-3 və 4 otaqlı planlaşdırma
-tam təmirli vəziyyət
-əvvəllər istifadə olunmamış
-çıxarışlı (kupçalı)
-ipoteka krediti ilə alınması mümkündür

Mənzil almaq istəyən şəxslər ms.sosial.gov.az portalına daxil olaraq mövcud mənzillərlə tanış ola və seçdikləri mənzili “Bron et” funksiyası vasitəsilə rezerv edə bilərlər.
Qaydalara əsasən, bir mənzil üçün maksimum 3 nəfər bron edə bilər. Əgər ilk bron edən şəxs mənzili almaqdan imtina edərsə, həmin mənzili almaq hüququ növbəti bron edən şəxsə keçir.
Bron edilən mənzilin alınması üçün alıcı ilə Nazirlik arasında 10 gün ərzində alqı-satqı müqaviləsi imzalanır.
Qeyd olunub ki, fiziki və ya hüquqi şəxslər bu mənzillərdən istədikləri sayda əldə edə bilərlər.
Satışdan əldə olunan vəsait isə ölkənin müxtəlif bölgələrində şəhid ailələri və müharibə ilə əlaqədar əlilliyi olan şəxslərin mənzil təminatına yönəldiləcək.
Əlavə məlumat almaq istəyən vətəndaşlar 142 Çağrı Mərkəzinə müraciət edə bilərlər.