Bakıda 1600 ev söküləcək – kompensasiya veriləcəkmi?

Bakıda kollektor üzərində tikilən ev söküldü – ciddi problem yenidən gündəmdə.
Azərbaycan Qiymətləndiricilər Cəmiyyətinin (AQC) sədri Vüqar Oruc “Yeni Sabah”a açıqlamasında deyib ki, kollektor üzərindəki bütün evlər qanunsuz tikili statusundadır.

“Ekspert bildirib ki, yüksək gərginlikli elektrik xətlərinin altı, müxtəlif kommunal xətlərin keçdiyi sahələr, eləcə də meşə təsərrüfatına aid ərazilərdə tikinti işlərinin aparılması qanunvericiliklə qadağan edilir.”

O qeyd edib ki, kollektorların üzərində inşa edilən evlər sökülərsə, vətəndaşlara kompensasiya veriləcək:

“Məsələ burasındadır ki, kollektor üzərində tikinti aparılarkən, niyə prosesə mane olunmayıb? Təbii ki, vətəndaşın belə ərazilərdə tikinti apararkən xərc çəkib. Azərbaycan sosial dövlətdir və yəqin ki, söküntülər aparılarsa, vətəndaşa kompensasiya ödəniləcək. Çünki vətəndaşın evsiz qalması və taleyin ümidinə buraxılması bizim dövlətimizin prinsip və maraqlarına uyğun deyil. Bu baxımdan düşünürəm ki, həmin vətəndaşlara mütləq kompensasiya ayrılmalıdır. Təbii ki, yekun qərarı müvafiq qurumlar verəcək. Amma indiyə qədərki yanaşmalardan çıxış edərək söyləmək olar ki, vətəndaşın çəkdiyi xərclər ödənilməlidir”.
Ekspert vurğulayıb ki, vətəndaşın kommunal xidmət xərclərini ödəməsi dolayı yolla həmin daşınmaz əmlak üzərindəki mülkiyyətini təsdiqləyir.

“Kollektorların üzərində inşa edilmiş evlərin bir çox hallarda mülkiyyət hüququ rəsmi şəkildə təsbit edilməsə belə, vətəndaş müəyyən xərc çəkibsə həmin ev ona məxsusdur. Eyni zamanda belə vətəndaşlar müəyyən müddət ərzində kommunal ödənişləri ödəyib. Vətəndaşın kommunal xidmət xərclərini ödəməsi dolayı yolla həmin daşınmaz əmlak üzərindəki mülkiyyətini təsdiqləyir. Bu baxımdan söküntü olarsa, belə vətəndaşlara kompensasiya veriləcək”.