Azərbaycanda dövlət torpaqlarının xüsusi əmlakla dəyişdirilməsinə hüquqi əsas yaradıldı

Milli Məclis Torpaq Məcəlləsi, Mülki Məcəllə və "Qiymətləndirmə fəaliyyəti haqqında" qanuna dəyişiklikləri III oxunuşda qəbul edib. Yeni dəyişikliklər dövlət mülkiyyətində olan əmlakın və torpaq sahələrinin xüsusi mülkiyyətdə olan əmlakla qarşılıqlı razılıq əsasında dəyişdirilməsinin hüquqi əsasını yaradır.

Evonline.az xəbər verir ki, qəbul edilən dəyişikliklərə əsasən, dövlətə məxsus əmlak, o cümlədən dövlət torpaqları müəyyən şərtlər daxilində xüsusi mülkiyyətdə olan əmlak və ya torpaq sahələri ilə dəyişdirilə biləcək. Bununla yanaşı, özəlləşdirilməsi qadağan olunan dövlət əmlakı, dövlətin müstəsna mülkiyyətində olan torpaqlar və dövlət ehtiyacları üçün ayrılmış torpaq sahələri bu mübadilənin predmeti olmayacaq.

Yeni qaydalara görə, dəyişdirilən əmlakların və torpaq sahələrinin dəyəri bazar qiymətləri əsasında müstəqil qiymətləndirici tərəfindən müəyyən ediləcək. Eyni zamanda, qanuna edilən dəyişiklik nəticəsində dövlət orqanları və bələdiyyələr də qiymətləndirmə fəaliyyəti üzrə sifarişçi statusu əldə edəcəklər.

Qanun qüvvəyə mindikdən sonra dövlət mülkiyyətində olan əmlakın və torpaq sahələrinin xüsusi mülkiyyətdə olan əmlakla dəyişdirilməsi qaydaları ayrıca təsdiq ediləcək. Bu qaydalar mübadilə prosesinin daha şəffaf və vahid mexanizm əsasında həyata keçirilməsini təmin edəcək.

Dəyişikliklərin əsas məqsədi torpaq və əmlakdan daha səmərəli istifadəni təşviq etmək, torpaq bazarında dövriyyəni artırmaq, iqtisadi fəallığı gücləndirmək və dövlətlə vətəndaşlar arasında qarşılıqlı razılığa əsaslanan əmlak mübadiləsini daha çevik şəkildə həyata keçirməkdir. Yeni hüquqi mexanizmin həm dövlətin, həm də xüsusi mülkiyyət sahiblərinin hüquqlarının qorunmasına və mülki dövriyyənin inkişafına töhfə verəcəyi gözlənilir.