Azərbaycanda yeni parklanma qaydaları təsdiqləndi – Yeni tikilən binalar üçün minimum parkinq sayı müəyyənləşdi

Evonline.az xəbər verir ki, Dövlət Şəhərsalma və Arxitektura Komitəsinin Kollegiyası yaşayış və qeyri-yaşayış obyektləri üçün parklanma yerlərinin minimal sayının məcburi kvotasını təsdiqləyib. Yeni qaydalar yaşayış kompleksləri, ticarət obyektləri, təhsil və səhiyyə müəssisələri də daxil olmaqla müxtəlif təyinatlı tikililərdə parklanma probleminin həllini və şəhər infrastrukturunun daha səmərəli təşkilini hədəfləyir.

Yeni tələblərə əsasən, çoxmənzilli yaşayış binalarında hər mənzil üçün minimum bir avtomobil yeri ayrılması məcburidir. Sahəsi 180 kvadratmetr və ya daha böyük olan mənzillər üçün isə hər mənzilə 1,3 parkinq yeri nəzərdə tutulacaq. Fərdi yaşayış evlərinin hər biri üçün də ən azı bir avtomobil yeri ayrılması tələb edilir.

Qərara əsasən, çoxmənzilli yaşayış binalarında yaradılan parklanma yerlərinin ən azı 50 faizi yeraltı parkinq şəklində olmalıdır. Bu tələb xüsusilə iri şəhərlərdə torpaq sahəsindən daha səmərəli istifadə və həyətlərdə avtomobil sıxlığının azaldılması məqsədi daşıyır.

Yeni qaydalar ofis və inzibati binaları da əhatə edir. Dövlət qurumlarının binalarında hər 75 kvadratmetr, bələdiyyə binalarında isə hər 100 kvadratmetr ümumi sahəyə görə bir avtomobil yeri ayrılması nəzərdə tutulur. Banklar, hüquq şirkətləri, sığorta təşkilatları və digər ofis binalarında isə hər 50 kvadratmetr sahəyə bir parkinq yeri yaradılması tələb olunur.

Ticarət və xidmət obyektləri üçün də ayrıca normalar müəyyən edilib. Böyük mağazalarda 200 kvadratmetrdən artıq olan hər 50 kvadratmetr sahəyə görə bir avtomobil yeri ayrılmalıdır. Topdansatış bazarları və bazarlarda hər 100 kvadratmetr sahəyə üç parkinq yeri tələb olunur. Restoranlarda hər 50 kvadratmetr, kafelərdə isə hər 75 kvadratmetr sahəyə görə bir avtomobil yeri nəzərdə tutulub. Şadlıq sarayları və mərasim zalları üçün isə norma daha yüksək müəyyənləşdirilib və hər 30 kvadratmetr sahəyə bir parkinq yeri ayrılması məcburidir.

Təhsil və səhiyyə müəssisələri də yeni qaydaların əhatə dairəsinə daxil edilib. Məktəbəqədər və ümumtəhsil müəssisələrində hər 300 kvadratmetr, ali və orta ixtisas təhsil müəssisələrində isə hər 200 kvadratmetr sahəyə görə bir avtomobil yeri ayrılması tələb olunur. Poliklinikalarda hər 100 kvadratmetr üçün bir, xəstəxanalarda isə hər beş çarpayıya bir parkinq yeri nəzərdə tutulur.

Qərarda elektrik mühərrikli nəqliyyat vasitələri ilə bağlı da yeni tələb yer alıb. Belə ki, 50 və daha çox parklanma yeri olan tikinti obyektlərində yerlərin ən azı 5 faizi elektrik avtomobillərinin enerji doldurulması üçün xüsusi avadanlıqla təchiz edilməlidir.

Bundan başqa, metro, tramvay və şəhərətrafı dəmir yolu stansiyalarına piyada məsafəsi 400 metrdən çox olmayan qeyri-yaşayış obyektlərində parklanma yerlərinin sayının 30 faiz azaldılmasına icazə verilir. Əhalisi 50 min nəfərə qədər olan yaşayış məntəqələrində isə müəyyən edilmiş minimal kvotaların 50 faiz, 50–100 min nəfər arasında olan yaşayış məntəqələrində isə 25 faiz azaldılması mümkündür.

Qeyd olunub ki, kənd yaşayış məntəqələrində (Abşeron rayonunun kəndləri istisna olmaqla) bu minimal parklanma kvotaları tətbiq edilməyəcək. Eyni zamanda tikinti obyektinin təyinatı dəyişdirildikdə yeni təyinata uyğun parklanma norması da təmin olunmalıdır.

Yeni qaydaların tətbiqi gələcəkdə inşa ediləcək yaşayış kompleksləri və kommersiya obyektlərində avtomobil sıxlığının azaldılması, parklanma çatışmazlığının aradan qaldırılması və şəhərsalma standartlarının daha müasir tələblərə uyğunlaşdırılması baxımından mühüm addım hesab olunur.