Bakıda qarajların 1 kvadratmetrinin qiyməti 1 414 manatı keçdi

Bakıda qaraj qiymətləri rekord səviyyəyə yüksəlib. Azərbaycan Qiymətləndiricilər Palatasının (AQP) 2026-cı ilin iyun ayı üzrə hazırladığı təhlilə əsasən, paytaxtda qarajların qiymət artımı davam etsə də, bazarda əvvəlki aylarla müqayisədə daha sabit dinamika müşahidə olunub.

Hesabata görə, iyun ayında qarajların 1 kvadratmetrinin median qiyməti 10,6 faiz artaraq 1 414 manata, orta qiyməti isə 1 530 manata çatıb. Təhlil 125 elan əsasında aparılıb, statistik təmizləmə nəticəsində 110 elan yekun hesablamaya daxil edilib.

AQP bildirir ki, may ayında müşahidə olunan sürətli qiymət artımından sonra iyunda bazar daha balanslı inkişaf mərhələsinə keçib. Median və orta qiymət göstəricilərinin bir-birinə yaxın olması bazarda struktur sabitliyinin formalaşdığını göstərir.

Qiymətlərin formalaşmasına ən çox təsir edən ərazilər Səbail, Nərimanov və Yasamal rayonları olaraq qalır. Bu rayonlarda yerləşən qarajlar premium seqment hesab olunduğundan qiymətlər digər ərazilərlə müqayisədə daha yüksəkdir. Şəhərin kənar hissələrində isə qaraj qiymətləri nisbətən aşağı olsa da, ümumi bazarda sabitlik qorunur.

Mütəxəssislərin fikrincə, qaraj bazarı həcminin kiçik olması səbəbindən iri və ya premium satışlar qiymətlərə ciddi təsir göstərə bilir. Buna baxmayaraq, iyun ayında müşahidə olunan balanslaşma bazarın daha stabil inkişaf etdiyini göstərir.

AQP-nin qiymətləndirməsinə əsasən, yaxın aylarda Bakıda qaraj qiymətlərində kəskin dəyişikliklər gözlənilmir. Bununla belə, bazarın həssas xarakteri səbəbindən ayrı-ayrı premium satışların qiymətlərdə müəyyən dəyişkənlik yaratması ehtimalı qalır.