Bakıda tələbələr üçün ən münasib kirayə evlər haradadır? – Qiymətlər və ərazilər

Bakıda tələbələr üçün ən münasib kirayə ərazilər

Bölgələrdən Bakıya gələn tələbələr üçün əsas problem artıq təkcə universitetə qəbul deyil, yaşayış yeri tapmaqdır. Avqustun ortasından sentyabrın ortalarına qədər kirayə bazarında tələbatın artması qiymətləri də yüksəldir.

Azərbaycan Qiymətləndiricilər Cəmiyyətinin sədri Vüqar Orucun sözlərinə görə, kirayə qiymətləri son illərdə ildə təxminən 10–15% artır. Metroya yaxın mənzillər isə bəzi hallarda 600–900 manat aralığında təklif olunur.

Nisbətən münasib ərazilər: Binəqədi, Azadlıq prospekti, 9-cu mikrorayon, Nəsimi metrosu ətrafı, Yeni Yasamal, 20 Yanvar, İnşaatçılar, Neftçilər, Xalqlar Dostluğu və Qara Qarayev.

Bu ərazilərdə kirayələr metroya daha yaxın və mərkəzi ərazilərlə müqayisədə təxminən 20–25% ucuz ola bilər. Tələbələrin bir neçə nəfər birlikdə ev tutması da xərci bölməyə imkan verir.

1–2 otaqlı mənzillər münasib ərazilərdə təxminən 400–500 manatdan başlayır. Əşyalı, təmirli və nəqliyyata yaxın evlər isə daha baha olur.

Mərkəzə yaxın ərazilərdə qiymətlər xeyli yüksəkdir: 28 May, Nizami, Sahil və İçərişəhər ətrafında 1 otaqlı mənzillər 700–900, 2 otaqlılar isə 900–1200 manat civarında ola bilər.

Xırdalan, Yeni Günəşli, Alatava kimi ərazilərdə daha ucuz ev tapmaq mümkündür, amma tıxac və nəqliyyat məsələsi tələbənin hər gün universitetə gedib-gəlməsini çətinləşdirə bilər.