Miras qalan evə vergi ödənilirmi? Əmlak əldə edənlər bunu bilməlidir

Əgər miras olaraq qəbul edilən əmlak daşınmaz əmlakdırsa, onu vərəsəlik yolu ilə əldə edən şəxs həmin əmlakın mülkiyyətçisi sayılır. Bu səbəbdən daşınmaz əmlakın miras yolu ilə əldə olunması mülkiyyət hüququndan yaranan vergi öhdəliklərini aradan qaldırmır.
Evonline.az BiG.AZ-a istinadən xəbər verir ki, bunu Vəkillər Kollegiyasının üzvü Rəşad Əliyev bildirib.
O, qeyd edib ki, mirası qəbul edən şəxs daşınmaz əmlak üzərində mülkiyyət hüququ əldə etdikdən sonra qanunvericilikdə nəzərdə tutulmuş müvafiq vergi öhdəliklərini yerinə yetirməlidir. Burada əsas məqam əmlakın hansı yolla əldə edilməsi deyil, onun şəxsin mülkiyyətinə keçməsidir:

"Vərəsəlik yolu ilə əldə edilən mənzil, fərdi yaşayış evi və ya digər daşınmaz əmlak üzrə vergi məsələsi də məhz bu hüquqi status nəzərə alınmaqla müəyyənləşdirilir. Yəni şəxs mirası qəbul etdikdən və əmlak onun mülkiyyətinə keçdikdən sonra həmin əmlakla bağlı qanunvericilikdə müəyyən edilmiş öhdəliklər yaranır.

Eyni zamanda, vətəndaşlar miras qalan əmlakla bağlı yalnız vergi məsələlərinə deyil, digər hüquqi prosedurlara da diqqət yetirməlidirlər. Mirasın qəbul edilməsi, daşınmaz əmlak üzərində mülkiyyət hüququnun rəsmiləşdirilməsi və müvafiq dövlət qeydiyyatının aparılması bu prosesin mühüm mərhələləridir.

Daşınmaz əmlakın vərəsəlik qaydasında qəbul edilməsi həmin əmlakın digər daşınmaz əmlaklar kimi hüquqi status qazanması ilə nəticələnir. Bu səbəbdən mirası qəbul edən şəxsin mülkiyyətçi kimi üzərinə düşən öhdəlikləri vaxtında yerinə yetirməsi vacibdir.

Beləliklə, vərəsəlik yolu ilə daşınmaz əmlak əldə edən şəxslər əmlakın mülkiyyətinə keçməsi ilə bağlı yaranan vergi öhdəliklərini nəzərə almalı və qanunvericilikdə müəyyən edilmiş qaydada müvafiq vergiləri ödəməlidirlər".