İKZF-dən 60 mindən çox şəxsə 4 milyard manatdan çox ipoteka krediti

İpoteka və Kredit Zəmanət Fondu (İKZF) tərəfindən indiyədək 60 016 borcalana ümumilikdə 4 milyard 92 milyon manat məbləğində ipoteka krediti verilib. Fondun açıqladığı statistikaya əsasən, verilən kreditlər həm adi, həm də güzəştli ipoteka proqramlarını əhatə edir.
Evonline.az bu barədə İKZF-yə istinadən xəbər verir.
Məlumata görə, bu günə qədər 41 013 borcalana ümumilikdə 2 milyard 966 milyon manat məbləğində adi ipoteka krediti verilib. Güzəştli ipoteka kreditlərinin sayı isə 19 003 olub və bu kreditlər üzrə ümumi məbləğ 1 milyard 126 milyon manat təşkil edib.

Bununla yanaşı, ilkin ödəniş üçün kifayət qədər şəxsi yığımı olmayan vətəndaşların daha aşağı ilkin ödənişlə ipoteka kreditindən yararlanmasına imkan yaratmaq məqsədilə 1 624 kreditə zəmanət verilib. Bu zəmanətlərin ümumi məbləği 56,6 milyon manat olub.

İKZF-nin məlumatına əsasən, indiyədək 10 092 mənzil də kirayəyə vermək yolu ilə vətəndaşlara təqdim edilib.

İpoteka və Kredit Zəmanət Fondu 2017-ci ilin sonunda “Azərbaycan İpoteka Fondu” və “Kredit Zəmanət Fondu” ASC-lərin birləşdirilməsi nəticəsində yaradılıb və həmin qurumların hüquqi varisi hesab olunur.

Fond uzunmüddətli və subsidiyalaşdırılmış ipoteka kreditlərinin verilməsi, eləcə də vətəndaşların daha əlçatan maliyyə resurslarına çıxışının təmin edilməsi istiqamətində fəaliyyət göstərir.