Azərbaycanda mənzillərin 1 kvadratmetrinin orta qiyməti 11,2% artıb

Azərbaycanda təkrar mənzil bazarında qiymətlər 2025-ci il ərzində yüksəlib. İl ərzində mənzillərin 1 kvadratmetrinin orta satış qiyməti 1 889 manatdan 2 099 manatadək artıb.

Evonline.az, “Daşınmaz Əmlakın Dövlət Kadastrı və Reyestri” publik hüquqi şəxsin təhlilinə istinadən xəbər verir ki, ölkə üzrə təkrar mənzil bazarında 1 kvadratmetrin orta qiyməti ilin ilk rübündə 1 889 manat təşkil edib. Dördüncü rübün sonunda isə bu göstərici 2 099 manata çatıb.

Beləliklə, 2025-ci ilin rübləri üzrə müqayisədə mənzillərin 1 kvadratmetrinin orta satış qiyməti təxminən 11,2 faiz yüksəlib.

Mənzillərin orta qiyməti də artıb

Qiymət artımı yalnız kvadratmetr göstəricisində deyil, mənzillərin orta satış qiymətində də müşahidə olunub. Bir mənzilin orta satış qiyməti I rübdə 127 470 manat olduğu halda, IV rübdə 132 015 manata yüksəlib.

Eyni zamanda, satılan mənzillərin orta sahəsində azalma qeydə alınıb. Birinci rübdə alqı-satqısı həyata keçirilən mənzillərin orta sahəsi 68 kvadratmetr olduğu halda, ilin son rübündə bu göstərici 63 kvadratmetr olub.

Bakıda qiymət artımı daha yüksək olub

Təhlilə görə, Bakıda da mənzillərin 1 kvadratmetrinin orta qiyməti il ərzində yüksəlib. Paytaxtda bu göstərici I rübdə 2 300 manat, II rübdə 2 459 manat, III rübdə 2 534 manat, IV rübdə isə 2 605 manat təşkil edib.

Nəticədə Bakıda 1 kvadratmetrin orta qiyməti ilin əvvəlindən sonuna qədər təxminən 13,3 faiz artıb.

2025-ci ildə 41 mindən çox mənzil satılıb

Hesabata əsasən, 2025-ci il ərzində ölkə üzrə təkrar mənzil bazarında 41 606 alqı-satqı əqdi həyata keçirilib. Satılan mənzillərin ümumi sahəsi 2 milyon 704 min 211 kvadratmetr, əqdlərin ümumi dəyəri isə 5,4 milyard manatdan çox olub.

Ölkə üzrə bir mənzilin orta satış qiyməti 129 835 manat, orta sahəsi isə 65 kvadratmetr təşkil edib.

Araşdırmada qeyd olunan göstəricilər 2025-ci ildə təkrar mənzil bazarında həm qiymətlərin yüksəldiyini, həm də rüblər üzrə satılan mənzillərin orta sahəsinin azaldığını göstərir.