Bakıda əmlak alarkən hansı ərazilərin gələcəkdə dəyəri arta bilər?

Bakıda daşınmaz əmlak almağı planlaşdıranlar üçün əsas sual yalnız “hansı rayon daha yaxşıdır?” olmamalıdır. Daha önəmli məqam seçilən ərazinin gələcəkdə əmlakın dəyərinin artmasına təsir göstərə biləcək inkişaf potensialına malik olub-olmamasıdır.

Evonline.az xəbər verir ki, mövzu ilə bağlı BiG.AZ-a açıqlama verən əmlak məsələləri üzrə ekspert Fərid Cəfərli bildirib ki, əmlak alarkən yalnız mövcud qiyməti əsas meyar kimi götürmək düzgün deyil. Onun sözlərinə görə, ərazinin gələcək inkişaf perspektivləri də ətraflı şəkildə nəzərə alınmalıdır.

Ekspert qeyd edib ki, bu zaman nəqliyyat infrastrukturu və metroya çıxış imkanları, yeni yol layihələri, sosial infrastruktur, ərazidə həyata keçirilən yaşayış və kommersiya layihələri, torpaq ehtiyatlarının azalması, eləcə də daşınmaz əmlaka real tələbat kimi bir sıra amillər birlikdə qiymətləndirilməlidir.
"İlk növbədə Xətai rayonunun inkişaf edən hissələrini qeyd etmək olar. Xüsusilə Ağ Şəhər və onun ətrafında həyata keçirilən şəhərsalma, nəqliyyat və tikinti layihələri ərazinin strukturunu dəyişir. Daha önəmlisi, Bakı Metropoliteninin 2030-cu il inkişaf sxemində Ağ Şəhər, NZS, keçmiş Bakı Avtomobil Zavodu ərazisi və Həzi Aslanov istiqamətində yeni stansiyaların yaradılması nəzərdə tutulur. Bu tip infrastruktur layihələri ərazinin əlçatanlığını artırdığı üçün daşınmaz əmlakın gələcək bazar cəlbediciliyinə təsir edən amillərdən biri ola bilər.
İkinci istiqamət kimi Yasamal rayonunun inkişaf edən hissələrini göstərmək mümkündür. Burada əsas üstünlüklər artıq formalaşmış yaşayış mühiti, şəhər mərkəzinə yaxınlıq, nəqliyyat və sosial infrastrukturun mövcudluğudur. Bu amillər ərazidə mənzilə olan tələbin qorunmasına və əmlakın likvidliyinə təsir göstərə bilər.

Nərimanov və Nəsimi kimi mərkəzə yaxın rayonlarda isə başqa üstünlük mövcuddur. Burada əsas faktor ərazinin sıfırdan formalaşması deyil, artıq formalaşmış yüksək tələb və likvidlikdir. 2026-cı ilin məlumatlarında Nərimanov və Nəsimi ikinci əl mənzil bazarında yüksək qiymətli rayonlar sırasında görünür. Buna görə də belə ərazilərdə alıcı üçün əsas məsələ "ucuz alıb qısa müddətdə bahalaşdırmaq" deyil, daha çox likvid və uzunmüddətli dəyəri qoruma potensialı olan əmlak seçməkdir.

Digər tərəfdən, Sabunçu, Suraxanı, Binəqədi və Xəzər rayonlarının müəyyən hissələri daha aşağı giriş qiyməti baxımından diqqət çəkə bilər. Lakin burada seçim zamanı yalnız qiymətin aşağı olması əsas meyar kimi götürülməməlidir. Ərazinin gələcəkdə nə qədər inkişaf edəcəyi, nəqliyyat imkanlarının necə dəyişəcəyi, yeni layihələrin planlaşdırılıb-planlaşdırılmadığı və həmin ərazidə real alıcı tələbinin olub-olmaması ayrıca araşdırılmalıdır.

Nəticə etibarilə, Bakıda daşınmaz əmlak alarkən "ən yaxşı rayon" anlayışından daha çox "ən doğru seçilmiş ərazi" yanaşması önə çıxır. Eyni rayon daxilində belə, bir küçə və ya yaşayış kompleksi digərindən ciddi şəkildə fərqlənə bilər. Buna görə də əmlakın gələcək dəyərini müəyyənləşdirərkən bugünkü qiymətlə yanaşı, ərazinin inkişaf dinamikası, nəqliyyat əlçatanlığı, infrastruktur layihələri və real bazar tələbi birlikdə qiymətləndirilməlidir".